ریاست یوٹاہ کے حکام نے بتایا ہے کہ 22 سالہ ٹائلر رابنسن کو چارلی کرک کے قتل کے الزام میں گرفتار کر لیا گیا ہے۔
رابنسن پر شدید نوعیت کے قتل اور دیگر سنگین جرائم کے الزامات ہیں اور اسے یوٹاہ کاؤنٹی جیل میں رکھا گیا ہے۔ حکام کے مطابق ملزم نے اکیلے کارروائی کی۔یہ گرفتاری ایک طویل اور پیچیدہ آپریشن کے بعد عمل میں آئی جو بدھ کو یوٹاہ ویلی یونیورسٹی میں کرک کے ہجوم کے سامنے قتل کے بعد شروع ہوا تھا۔ دورانِ تفتیش دو بار غلط گرفتاریوں کا اعلان بھی کیا گیا، مگر آخرکار ملزم واشنگٹن کاؤنٹی سے پکڑا گیا۔ گورنر اسپینسر کاکس نے بتایا کہ ملزم کے ایک رشتہ دار نے ایک دوست کو بتایا کہ وہ قتل کا اعتراف کر چکا ہے، جس پر حکام کو اطلاع دی گئی۔پراسیکیوٹر جَیف گرے کے مطابق منگل کو ملزم کے خلاف باضابطہ فرد جرم عائد کی جائے گی، جبکہ پہلی عدالت میں پیشی آن لائن سماعت کے ذریعے ہو گی۔ دوسری جانب ایریکا کرک، مقتول کی اہلیہ، نے اپنے پہلے بیان میں کہا کہ ان کے شوہر کا مشن جاری رہے گا اور انہیں "شہید کا تاج” مل گیا ہے۔تحقیقات میں ملزم کی رائفل کے ساتھ کچھ کارتوس بھی برآمد ہوئے جن پر مختلف پیغامات کندہ تھے۔ حکام کے مطابق ان پیغامات میں انتہا پسند علامتوں اور انٹرنیٹ کلچر کی جھلک نظر آئی، تاہم جنسیت یا دیگر تنازعات سے متعلق براہِ راست کوئی تعلق نہیں ملا۔