نفرت، تشدد اور دہشت گردی کے خلاف متحد ہونا ہوگا، میئر ایڈمز

نیویارک کے میئر ایرک ایڈمز نے کہا ہے کہ ملک کو نفرت انگیزی، سیاسی تشدد اور دہشت گردی کے خطرات کے خلاف اجتماعی طور پر کھڑا ہونا ہوگا۔ 

انہوں نے یہ بات 77 ڈبلیو اے بی سی کے پروگرام Sid & Friends in the Morning، فاکس نیوز کے Fox & Friends اور پکس 11 کے Morning News at 7AM میں گفتگو کرتے ہوئے کہی۔میئر ایڈمز نے کہا کہ چارلی کرک کے قتل جیسے واقعات اور 9/11 کی یاد دہانی اس بات کا ثبوت ہیں کہ انتہا پسندی کی جڑیں اب بھی موجود ہیں۔ ان کے مطابق وہ ہر سال 10 ستمبر کو گراؤنڈ زیرو کا دورہ کرتے ہیں تاکہ اس دن کے جذباتی بوجھ کے لیے خود کو ذہنی طور پر تیار کرسکیں۔ انہوں نے کہا کہ چاہے حملے 24 سال پرانے ہوں یا کل کے دن کی دہشت گردی، ان کے اثرات اب بھی زندہ ہیں اور متاثرین اور خاندان آج بھی دکھ سہہ رہے ہیں۔انہوں نے زور دیا کہ چارلی کرک کا قتل محض ایک فرد پر حملہ نہیں بلکہ جمہوریت اور امریکی اقدار پر حملہ ہے۔ میئر کے مطابق وہی نفرت جس نے ورلڈ ٹریڈ سینٹر پر جہاز گرائے تھے، اسی نفرت نے ایک سیاسی رہنما کی جان لی ہے۔ ایڈمز نے کہا کہ بطور سابق پولیس افسر اور موجودہ میئر، ان کی ذمہ داری ہے کہ شہر کو ہر قسم کے تشدد اور دہشت گردی سے محفوظ رکھا جائے۔میئر ایڈمز نے مزید کہا کہ نیویارک اور پورے امریکا کو اس وقت سب سے بڑی ضرورت یہ ہے کہ شہری اختلاف رائے کو دشمنی میں نہ بدلیں۔ ان کا کہنا تھا کہ اگر ہم نے نفرت انگیز بیانیے اور تشدد کے کلچر کو روکا نہیں تو ہم ایک خطرناک دوراہے پر پہنچ جائیں گے۔انہوں نے آخر میں کہا کہ امریکی عوام کو یاد رکھنا چاہیے کہ اتحاد ہی سب سے بڑی طاقت ہے اور یہی دہشت گردی اور نفرت کا اصل جواب ہے۔