برونکس(ویب ڈیسک) نیویارک کے علاقے برونکس میں ڈومینیکن ورثے کی پریڈ کے اختتام پر فائرنگ اور چاقو زنی کے واقعات میں چار افراد زخمی ہو گئے۔
حکام کے مطابق، یہ پرتشدد واقعات گرینڈ کانکورس اور 170ویں اسٹریٹ کے قریب اس وقت پیش آئے جب پریڈ کے بعد ہجوم منتشر ہو رہا تھا۔ پولیس کے مطابق ایک گھنٹے کے دوران تین مختلف مقامات پر تشدد کے واقعات رپورٹ ہوئے، جن میں ایک 19 سالہ نوجوان کو ٹانگ پر چاقو مارا گیا، 24 سالہ نوجوان کو ٹانگ پر گولی لگی جبکہ ایک مرد و خاتون کو بالترتیب گردن اور ٹخنے پر گولی ماری گئی۔ تمام زخمیوں کو فوری قریبی اسپتال منتقل کر دیا گیا ہے۔ پولیس کا کہنا ہے کہ پریڈ مجموعی طور پر پرامن رہی لیکن اختتام پر پیش آنے والے پرتشدد واقعات نے سیکیورٹی خدشات کو نمایاں کیا۔ پولیس نے واقعے کی تحقیقات کا آغاز کر دیا ہے اور شہریوں سے درخواست کی ہے کہ وہ کسی بھی مشتبہ سرگرمی کی فوری اطلاع دیں تاکہ ایسے واقعات کی روک تھام کی جا سکے۔