واشنگٹن(ویب ڈیسک) امریکی صدر ڈونلڈ ٹرمپ نے کینیڈا سے درآمد کی جانے والی اشیاء پر یکم اگست سے 35 فیصد نیا ٹیرف عائد کرنے کا اعلان کردیا ہے۔
امریکی خبررساں ادارے رائٹرز کے مطابق، اپنے سوشل میڈیا پلیٹ فارم پر جاری ایک خط میں صدر ٹرمپ نے کینیڈین وزیرِاعظم مارک کارنی کو مطلع کیا کہ یہ نیا نرخ یکم اگست سے نافذ العمل ہوگا، اور اگر کینیڈا نے جوابی اقدامات کیے تو یہ شرح مزید بڑھ سکتی ہے۔ ٹرمپ نے دیگر ممالک کو بھی متنبہ کیا کہ وہ امریکی برآمدات پر اگر رعایتیں نہیں دیتے تو انہیں بھی دوگنا ٹیرف دینا پڑے گا، ہم دیگر تمام ممالک پر بھی 15 سے 20 فیصد کے درمیان عمومی ٹیرف عائد کرنے پر غور کر رہے ہیں۔ وزیرِاعظم کارنی نے ایکس اکاؤنٹ پر اپنے ردعمل میں کہا کہ ان کی حکومت امریکی حکام کے ساتھ مذاکرات میں کینیڈین کارکنوں اور کاروباروں کا دفاع جاری رکھے گی کیونکہ وہ اس ڈیڈ لائن کی جانب بڑھ رہے ہیں۔ یہ 35 فیصد ٹیرف اس وقت نافذ 25 فیصد شرح سے بڑھا کر لگایا جا رہا ہے، جو صدر ٹرمپ نے پہلے ہی کینیڈا پر عائد کر رکھا تھا۔ یہ اقدام وزیرِاعظم کارنی کے لیے ایک دھچکا ہے جو واشنگٹن کے ساتھ ایک تجارتی معاہدہ کرنے کی کوشش میں تھے۔ صدر ٹرمپ نے اپنے خط میں کینیڈا سے فینٹانائل کی مبینہ اسمگلنگ، اور اس کے ٹیرف اور غیر ٹیرف تجارتی رکاوٹوں پر شکایت کی، جن سے امریکی ڈیری فارمرز اور دیگر شعبے متاثر ہو رہے ہیں۔ انہوں نے کہا کہ تجارتی خسارہ امریکی معیشت اور قومی سلامتی کے لیے خطرہ ہے۔ ٹرمپ نے لکھا، اگر کینیڈا فینٹانائل کی آمد کو روکنے کے لیے میرے ساتھ کام کرے گا، تو شاید ہم اس خط میں ترمیم پر غور کریں۔